ابڙو اڪيڊمي Abro Academy
2020-07-22
داخلا نمبر 606
عنوان ٽِيٽو لاڏوڻي، ابلق ٽِيٽَو
شاخ پکي
پڙهيو ويو 368
داخلا جو حوالو:
ٽِيٽو لاڏوڻي، ابلق ٽِيٽَو
43 سينٽي ميٽر (17 انچ) جسامت واري هن پکيءَ جا نر ماد هڪجهڙا ٿيندا آهن. رنگ جو اڇو ۽ ڪارو ٿئي ٿو. مٿو، ڪنڌ، پرن جا ڪلها ۽ پرن جون پڇڙيون ۽ پڇ ڪارو ٿئيس ٿو. ڳچي، ڇاتي، پيٽ، پُٺي اَڇي ۽ پرن جي وچين حصي ۾ به اڇا کنڀ ٿينس ٿا.
هن پکيءَ جي چهنب ڊگهي، ڪاري ۽ مٿئين پاسي مڙيل ٿئي ٿي. ابلق ٽيٽو جا پير بدڪ وانگر ڳنڍيل هوندا آهن، جيڪا ڪنڌيءَ تي رهندڙ پکين جي عام وصف نه آهي. اهو مٺي جي ڍنڍن، ساحلي ڍنڍن ۾ تانگهن پاڻين تي نظر ايندو آهي. ان جي شڪار جو طريقو هي آهي ته اهو پاڻيءَ ۾ بيهي پنهنجي چهنب پاڻيءَ ۾ وجهي مٿو ۽ چهنب هيڏانهن هوڏانهن گهمائيندو آهي ۽ ڪوبه آبي جانور چهنب کي لڳو ته جهٽ هڻي وٺندو اٿس. اهو شڪار جو پيڇو به ڪندو آهي ۽ بدڪ وانگر ترندو به آهي. آکيرو کليل ڪنڌين تي ڪالونين جي صورت ۾ ٺاهيندو آهي، جيڪو زمين تي هلڪي کڏ تي گاهه، ڪانا ۽ پٿراڙيون چونڊي ٺاهيو ويندو آهي. سڄي يوريشيا ۽ آفريڪا ۾ ٿئي ٿو.